Wednesday, February 13, 2013

ആറു വര്‍ഷത്തില്‍ നിന്ന് ആറുമാസത്തിലേക്കുള്ള ദൂരം



പ്രിയപ്പെട്ട ദിയക്കുട്ടീ.....

സുഖല്ലേ ദിയക്കുട്ടി? ദിയക്കുട്ടി ഇപ്പോള്‍ എന്തെടുക്കുകയാണ്? എന്നെ കാണാന്‍ തോന്നാറുണ്ടോ? എനിക്ക് ദിയകുട്ടിയെ എപ്പോഴും കാണണമെന്ന് തോന്നും. എന്താ ചെയ്യാ? നമ്മള്‍ ഒരുപാട് ദൂരത്ത്‌ അല്ലെ? കടലുകള്‍ക്കിപ്പുറത്ത്‌ എന്നും ഞാന്‍ ദിയക്കുട്ടിയെ സ്വപ്നം കാണും. ദിയക്കുട്ടിയുടെ ചിരി കേള്‍ക്കാന്‍ ഇപ്പോള്‍ എന്താ ഞാന്‍ ചെയ്യാ? എനിക്ക് വല്ലാതെ മിസ്‌ ചെയ്യുന്നു.

ദിയക്കുട്ടീ, എന്നെ സ്കൂളില്‍ ചേര്‍ത്തി. ബിര്‍ള പബ്ലിക്‌ സ്കൂളില്‍.
K.G. II C ആണ് എന്റെ ക്ലാസ്സ്‌. എനിക്കിവിടെ പുതിയ ഫ്രണ്ട്സ് ഒക്കെയുണ്ട്. എന്ത് രസമാണെന്നോ. രാവിലെ നേരത്തെ എഴുന്നേല്ക്കണം. എനിക്ക് നല്ല ഇഷ്ടമാണ് സ്കൂളില്‍ പോവാന്‍. ദിയക്കുട്ടി ഇങ്ങോട്ട് വാ.. എന്നാല്‍ നമുക്ക്‌ ഒരുമിച്ചു സ്കൂളില്‍ പോവാല്ലോ.

ദിയക്കുട്ടിക്ക് ഓര്‍മയുണ്ടോ നമ്മള്‍ താഴത്തെ ഉമ്മച്ചിയുടെ വീട്ടിലെ പശുവിനെ കാണാന്‍ പോയത്‌? നമ്മള്‍ അതിനു പുല്ല് എടുത്ത് കൊടുത്തത്? അപ്പോള്‍ പശുക്കുട്ടി നമ്മളെ നോക്കി ചിരിച്ചത് ഒക്കെ ഓര്‍മയുണ്ടോ? ദിയക്കുട്ടി പാവക്കുട്ടിക്ക് കരഞ്ഞപ്പോള്‍ ഞാന്‍ എന്‍റെ പാവയെ തന്നതും പിന്നെ ഒരുപാട് ഉമ്മകള്‍ തന്നതും ഇപ്പോഴും ഓര്‍മയുണ്ടോ?

എനിക്കറിയാം ദിയക്കുട്ടിക്ക് എന്നെ വലിയ ഇഷ്ടമാണെന്ന്. എന്നിട്ടും എന്താ ഞാന്‍ ഫോണ്‍ ചെയ്തപ്പോള്‍ ദിയക്കുട്ടി ഒന്നും മിണ്ടാതിരുന്നത്. എനിക്ക് ഒരുപാട് വിഷമമായി. എന്തെങ്കിലും ഒന്ന് പറഞ്ഞു കൂടായിരുന്നോ? എന്‍റെ ചക്കരക്കുട്ടി അല്ലെ? എന്നാലും ഇത്താത്തക്ക് ഒരു പരാതിയും ഇല്ലാട്ടോ.

ഇനിയെപ്പോഴാ ദിയക്കുട്ടീ നമ്മള്‍ കാണുക? നാട്ടില്‍ വരുമ്പോള്‍ കാണട്ടോ. ദിയക്കുട്ടിക്ക് നല്ല ഉടുപ്പും ചോക്ലേറ്റും കൊണ്ടു വരുന്നുണ്ട്. ദിയക്കുട്ടിക്ക് നല്ലത് വരാന്‍ ഇത്താത്ത എന്നും പ്രാര്‍ത്ഥിക്കുന്നുണ്ട്. ആയിരമായിരം ഉമ്മകളോടെ 

സ്വന്തം ഇത്താത്ത.
ദോഹ, ഖത്തര്‍.

ഈ കത്ത്‌ എന്‍റെ കയ്യില്‍ കിട്ടിയപ്പോള്‍ ആദ്യം തമാശ തോന്നിയെങ്കിലും പിന്നീട് ഉള്ളം പിടഞ്ഞു. സ്വന്തങ്ങളും ബന്ധങ്ങളും നഷ്ടമായികൊണ്ടിരിക്കുന്ന ഈ ലോകത്ത്‌, എസ് എം എസും ഇ ­മെയിലും ഫോണ്‍ ബന്ധങ്ങളും ഭരിക്കുന്ന ഇക്കാലത്ത് ആറു വയസ്സുള്ള ഒരു കുട്ടി ആറു മാസം പ്രായമായ ഒരു കുഞ്ഞിനു അയച്ച കത്താണിത്. ഇതില്‍ എഴുതിയതെല്ലാം എന്‍റെ സങ്കല്പം മാത്രം. അതൊക്കെ ആയിരിക്കാം ഈ ചിത്രം വരച്ചു കൊണ്ടു (മുകളില്‍ കാണിച്ചിരിക്കുന്ന ചിത്രം) ദിയകുട്ടിക്കുള്ള കത്ത് എന്നും പറഞ്ഞു എനിക്ക് തന്നപ്പോള്‍ അവളുടെ മനസ്സില്‍ വിരിഞ്ഞിട്ടുണ്ടാവുക.

ഒരു കത്ത്‌ കണ്ടിട്ടോ എഴുതിയിട്ടോ വര്ഷം കുറെ കഴിഞ്ഞു. എനിക്ക് വേണ്ടി ഞാന്‍ തന്നെ പോസ്റ്റ്‌ ചെയ്ത ഒരുപാട് കത്തുകള്‍ ഉണ്ടായിരുന്നു. പിന്നെ കത്തുകള്‍ വന്നിരുന്നത് കസിന്‍സ്‌ അയക്കുന്നവ ആയിരുന്നു. അത് തമിള്‍ മലയാളത്തില്‍ ആയിരുന്നു എഴുതാറു. വീട്ടിലുള്ളവര്‍ക്ക്‌ കിട്ടിയാല്‍ അത് മനസ്സിലാവരുത് എന്ന ഉദ്ദേശത്തോടെ ആയിരുന്നു തമിളില്‍ എഴുതിയിരുന്നത്. അതിനു വേണ്ടി മുപ്പതു ദിവസം കൊണ്ടു തമിള്‍ പഠിക്കാം എന്ന പുസ്തകം വാങ്ങിയാണ് തമിള്‍ പഠിച്ചത്. ആ കാലം കഴിഞ്ഞു. ഈ പുതിയ കാലത്ത് പണ്ടങ്ങനെ ആയിരുന്നു, ഇന്നിങ്ങനെ ആണ് എന്നൊന്നും പരിഭവിചിട്ടോ പരാതിപ്പെട്ടിട്ടോ കാര്യമില്ല. കാളകളെക്കാള്‍ കൂടുതല്‍ നന്നായി പണി എടുക്കുന്ന ട്രാക്ടര്‍ വന്നപ്പോള്‍ സൗകര്യം കൂടിയത് മറക്കാന്‍ പാടില്ല.

അവസാനമായി കത്തോ അതെന്താ സാധനം എന്നൊന്നും എന്നോട് ചോദിക്കരുത്. ഞാന്‍ വെറും അപരാധി. 

സസ്നേഹം ജസി ഫ്രണ്ട് 

Friday, February 8, 2013

അനാഥത്വം









പ്രായ പൂര്‍ത്തി ആവാത്ത പെണ്‍കുട്ടിയെയോ ആണ്‍കുട്ടിയെയോ പരസ്പര സമ്മതത്തോടെയോ ഭീഷണിപ്പെടുത്തിയോ നടത്തുന്ന ലൈംഗിക വേഴ്ച ഇന്ത്യന്‍ ശിക്ഷാ നിയമ പ്രകാരം പീഡനത്തിന്റെ പരിധിയില്‍ വരുന്ന ക്രിമിനല്‍ കുറ്റമാണ്. ഇന്ത്യയില്‍ മാത്രമല്ല ലോകത്തുടനീളം കണ്ടു വരുന്ന ലൈംഗിക പീഡനങ്ങള്‍ മനുഷ്യ മനസാക്ഷിയെ ഞെട്ടിച്ചു കൊണ്ടിരുന്നു. ഇപ്പോള്‍ ആ ഞെട്ടല്‍ മാറി അത് ഒരു വീരകൃത്യമായി. ബലാത്സംഗങ്ങള്‍ പുരുഷന്‍റെ പൌരുഷം അളക്കുന്നതിനുള്ള ഉപാധി ആയി മാറി കഴിഞ്ഞു എന്ന് പറയുന്നതാവും ഏറ്റവും ഉചിതം. നന്മ എന്നത് തിന്മയായും തിന്മ എന്നത് നന്മയായും കൊണ്ടു നടക്കുന്ന ഇന്ത്യ എന്ന മഹാ പീഡന രാജ്യത്ത്‌ ഇരകള്‍ വീണ്ടും വീണ്ടും പീഡിപ്പിക്കപ്പെട്ടു കൊണ്ടിരിക്കുന്നത് മനുഷ്യ സ്നേഹികള്‍ എന്ന നിലയില്‍ നമ്മെയെല്ലാം അസ്വസ്ഥരാക്കികൊണ്ടിരിക്കുന്നു.

എങ്ങനെ ഇന്ത്യയില്‍ ഇത്രയധികം പേര്‍ പീഡിപ്പിക്കപ്പെടുന്നു എന്ന രീതിയില്‍ ശരിയായ് വിധത്തില്‍ പഠനങ്ങള്‍ നടക്കുന്നില്ല എന്നത്‌ ദൌര്‍ഭാഗ്യകരമാണ്. ചിലര്‍ സ്ത്രീകളുടെ വസ്ത്രധാരണ രീതിയെ ചോദ്യം ചെയ്യുമ്പോള്‍ മറ്റു ചിലര്‍ പുരുഷന്‍റെ മനോഭാവം മാറ്റാന്‍ വേണ്ടി ശബ്ദം ഉയര്‍ത്തുന്നു. ഈ രണ്ടു കാര്യങ്ങളും ഇന്ത്യ എന്ന രാജ്യത്ത്‌ ഇപ്പോള്‍ നടക്കാത്ത സംഗതി ആയതിനാല്‍ കുറ്റം ചെയ്തവരെ പരമാവധി ശിക്ഷ നല്‍കി “ആദരിക്കുക” എന്നതിനാണ് മുന്‍തൂക്കം നല്‍കേണ്ടത്. വ്യത്യസ്ത മതങ്ങളും വ്യത്യസ്ത ചിന്താധാരകളും കൊണ്ടു സമ്പന്നമായ ഇന്ത്യയുടെ മണ്ണില്‍ പ്രതികള്‍ ശിക്ഷിക്കപ്പെടുന്നില്ല എന്നതാണ് സത്യം. ഗ്രന്ഥം ചുമക്കുന്ന കഴുതകളായി മാറി കഴിഞ്ഞു നാം. തെറ്റ് ചെയ്തവരെ ശിക്ഷിക്കുന്നതിനു പകരം രക്ഷിച്ചെടുക്കാന്‍ വേണ്ടി ശ്രമിക്കുന്ന രാഷ്ട്രീയ പാര്‍ടികളുടെ പ്രവര്‍ത്തനങ്ങള്‍ ഇനിയും പീഡനങ്ങള്‍ കൂട്ടുകയേ ഉള്ളൂ എന്ന ചിന്ത ഭാവിയെ കുറിച്ച് ആശങ്കപെടുന്ന, എന്നെ പോലെ ചിന്തിക്കുന്ന ഒരു പാട് ഇന്ത്യക്കാരെ വേദനിപ്പിക്കുന്നു. ഇന്ത്യയിലെ ഏതൊരു രാഷ്ട്രീയ പാര്‍ടിയെ എടുത്ത് നോക്കിയാലും തെറ്റ്‌ ചെയ്യുന്നത് സ്വന്തം അണികള്‍ ആണെങ്കില്‍ അല്ലെങ്കില്‍ സ്വന്തം നേതാക്കള്‍ ആണെങ്കില്‍ അവരെ രക്ഷിച്ചെടുക്കാന്‍ അവര്‍ നടത്തുന്ന ശ്രമങ്ങള്‍ മനുഷ്യ സ്നേഹികള്‍ക്ക് സഹിക്കാന്‍ കഴിയുന്നതല്ല.  ജനാധിപത്യം എന്നത് കുറ്റം ചെയ്തവരെ രക്ഷിക്കാന്‍ ഉള്ള ഒരു വ്യവസ്ഥിതി ആയി മാറി കഴിഞ്ഞു.

നമ്മുടെ യുവാക്കളെ ആരാഷ്ട്രീയര്‍ ആക്കുന്നതില്‍ രാഷ്ട്രീയപാര്‍ട്ടികള്‍ വിജയിച്ചിരിക്കുന്നു. നന്മയും തിന്മയും തിരിച്ചറിയാത്ത നപുംസകങ്ങളായി ഇന്ത്യന്‍ യുവത്വം അലയുന്നു. സിനിമകളിലും ഫാന്‍സ്‌ അസോസിയെഷനുകളിലും, സ്പോര്‍ട്സിലും പബ്ബിലും ബാറിലും നമ്മുടെ യുവാക്കള്‍ തളക്കപ്പെട്ടിരിക്കുന്നു. അഴിമതിയില്‍ മുങ്ങി കുളിച്ചു കിടക്കുന്ന ഭരണ പ്രതിപക്ഷങ്ങള്‍ നാടിന്‍റെ സാമൂഹികവും സാമ്പത്തികവുമായ പുരോഗതിക്ക്‌ തടസ്സമായി. കലയും സാഹിത്യവും സിനിമയും കച്ചവടമായി മാറി. എഴുത്തും വരയും പണം കൊടുത്തു വാങ്ങാന്‍ കഴിയുന്ന ആഭരണങ്ങളായി മാറി. സമൂഹത്തെ നേര്‍വഴിക്ക് നയിക്കാന്‍ പോന്ന കറപുരളാത്ത നേതാക്കള്‍ ശവക്കല്ലറയിലും ചിതകളിലും ഒടുങ്ങി. ഒരു സമൂഹത്തിന്റെ നെടുംതൂണ്‍ ആയി മാറേണ്ട യുവജനങ്ങള്‍ക്ക്‌ പ്രാതിനിത്യമില്ലാത്ത വ്യവസ്ഥിതി നിലവില്‍ വന്നു. ഇന്ത്യ വൃദ്ധ വയോജനങ്ങള്‍ ഭരിക്കുന്ന രാജ്യമായി മാറി. ജനങ്ങളെ അവര്‍ തെരുവിലറക്കി രാജ്യത്തെ കൊള്ളയടിക്കാന്‍ തുടങ്ങി. വര്‍ഗീയതയുടെ വിഷം വിതറി സാമൂഹിക പ്രശ്നങ്ങള്‍ക്ക് വേണ്ടി ഒന്നിക്കുന്നതില്‍ നിന്നും അവര്‍ നമ്മെ വിലക്കി. വര്‍ഗത്തിന്റെയും ജാതിയുടെയും മതത്തിന്റെയും അടിസ്ഥാനത്തില്‍ ജനങ്ങളെ ഭിന്നിപ്പിച്ചു ഭരിക്കാന്‍ തുടങ്ങി. ഉറങ്ങി കിടക്കുന്ന ഇന്ത്യന്‍ യുവത്വത്തിനു നേര്‍ വഴി കാണിക്കാന്‍ ആരുമില്ലാതെ അനാഥരായി. പരസ്പരം ശപിച്ചും തെറി പറഞ്ഞും കലഹിച്ചും നടക്കുന്ന പ്രവര്‍ത്തനമായി രാഷ്ട്രീയം ജനങ്ങളില്‍ നിന്ന് അകന്നു. ഇനി ഒരു ഉയിര്‍ത്തെഴുന്നേല്‍പ്പ് ഉണ്ടാവുമോ എന്ന് സംശയിക്കത്തക്കവൈധം കാര്യങ്ങള്‍ കൈവിട്ടു പോവുന്ന രീതിയില്‍ നമ്മുടെ ഇന്ത്യ മഹാ രാജ്യം മാറി. ഞാന്‍ ഇപ്പോഴും ഇന്ത്യയിലെ യുവാക്കളെ വിശ്വസിക്കുന്നു. ഒരു ശക്തിയായ്‌ ഒരു കൊടുങ്കാറ്റായി അവര്‍ തിരിച്ചുവരുമെന്ന് വിശ്വസിക്കുന്നു. വ്യക്തിപൂജയില്‍ നിന്നും രാഷ്ട്രീയപൂജയില്‍ വര്‍ഗീയ പൂജയില്‍ നിന്നും ഇന്ത്യന്‍ യുവത സ്വാതന്ത്ര്യം നേടുമെന്ന് പ്രതീക്ഷിക്കുന്നു.
ഇത്രയെങ്കിലും എന്നെ എഴുതാന്‍ പ്രേരിപ്പിച്ചത് ഒരു കാര്‍ട്ടൂണ്‍ ആണ്.
ഐഎന്റെ മനസാക്ഷിയെ കരയിച്ച ഒരു കാര്‍ട്ടൂണ്‍. ശ്രീ ജോയ്‌ കുളനടയുടെ മറുനാടന്‍ മലയാളി എന്നാ ഇ പത്രത്തില്‍ വന്ന മുകളില്‍ കൊടുത്തിരിക്കുന്ന കാര്‍ട്ടൂണ്‍ (
http://www.marunadanmalayali.com/index.php?page=newsDetail&id=9401).
(താഴെ ആദ്യ കോളം)

പീഡനത്തിനു ഇരയായ പെണ്‍കുട്ടിയെ വേട്ടക്കാരും സമൂഹവും വീണ്ടും വീണ്ടും പീഡിപ്പിക്കുന്നത് എന്നെ ഞെട്ടിക്കുകയും കരയിപ്പിക്കുകയും ചെയ്തു. മനസാക്ഷി
മരിച്ച ഇന്ത്യക്കാരനെയാണ് ജോയ്കുളനടയുടെ കാര്ടൂണ്പ്രതിനിധീകരിക്കുന്നത്. ഒരു കാര്ട്ടൂണിസ്റ്റ് എന്ന നിലയില്‍ വളരെ അപക്വമായ ഒരു വര. സര്‍വോപരി ഇരയോടുള്ള അവഹേളനം. പീഡനങ്ങളെ നിസ്സാരവല്കരിക്കുംപോള്കൈ വിട്ടു പോവുന്നത് നന്മയും പകരം ശക്തിയാര്ജ്ജിക്കുന്നത് തിന്മയുടെ കാവലാള്കളും ആവും. ഒരു കൂട്ടം മനുഷ്യ മൃഗങ്ങള്ചവിട്ടി മെതിച്ച ഒരു പെണ്കുട്ടിയുടെ നിസഹായതക്ക് മേല്നടത്തിയ ബാലാത്കാരം ആയി ഞാന്‍ ഈ കാര്ട്ടൂണിനെ കാണുന്നു.  ഒരു കലാകാരന് ഇത്തരം കാര്‍ട്ടൂണ്‍ വരക്കുന്നതില്‍ ഒരു തെറ്റും ഇല്ല. അത് അദ്ദേഹത്തിന്റെ വ്യക്തിപരമായ കാര്യമാണ്. ഞാന്‍ ഈ കാര്‍ട്ടൂണ്‍ ഇവിടെ ഉപയോഗിക്കാന്‍ കാരണം ഈ കാര്‍ട്ടൂണ്‍ നമ്മുടെ ഇപ്പോഴത്തെ മാനസികാവസ്ഥയെ പ്രതിനിധീകരിക്കുന്നു എന്നതാണ്.

നീതിയും ധര്‍മവും തിരിച്ചു വരുമെന്ന പ്രതീക്ഷയോടെ........ ജസി ഫ്രണ്ട്. 

Monday, February 4, 2013

ഉമ്മ





കണ്ണീര് പൊടിഞ്ഞ നാള്‍ മുതല്‍ 
കണ്ണീര് വറ്റുന്ന നാള്‍ വരെ 
കനവ് കാണാനും 
കനിവ് കാട്ടാനും പഠിപ്പിച്ച നന്മ 

കടലോളം സങ്കടം ഉള്ളിലുണ്ടെങ്കിലും 
ഒരു തുള്ളി പോലും തൂവാതെ 
പാട്ട് പാടിയും 
പാട്ട് പാടിച്ചും ഉറക്കിയ സംഗീതം 

ഇതള്‍ കൊഴിഞ്ഞ പൂക്കള്‍
ഞെട്ടറ്റു വീണ ബന്ധങ്ങള്‍ 
ഇതിനിടയില്‍ ഉമ്മ 
പുഞ്ചിരിയുമായ് നിറയുന്ന വസന്തം 

ഈ മരുഭൂമിയിലെ മരുക്കാറ്റിലും  
വിറങ്ങലിക്കുന്ന തണുപ്പിലും 
സ്വാന്തനമായ്‌ 
അകലെ ഉമ്മയുടെ പ്രാര്‍ത്ഥനകള്‍


ഒരുപാട് സ്നേഹത്തോടെ 
ഒരുപാട് പ്രതീക്ഷയോടെ
ഞാന്‍ ഒന്ന് ചോദിക്കട്ടെ
ഒരു ജന്മം കൂടി എന്റെ ഉമ്മയാവാമോ?




Friday, February 1, 2013

ആവിഷ്കാര സ്വാതന്ത്ര്യം


ആവിഷ്കാര സ്വാതന്ത്ര്യം








എന്‍റെ കണ്ണില്‍ കുത്തിയിട്ട്
എന്‍റെ കരള്‍ പറിച്ചെടുത്തിട്ട്
എന്‍റെ കയ്യും കാലും വെട്ടിമാറ്റി 
എന്‍റെ തുണി അഴിച്ചു നഗ്നാക്കി
ആവിഷ്കാര സ്വാതന്ത്ര്യം

എന്‍റെ മുറിവില്‍ എരിവ് പകര്‍ന്നു  
എന്‍റെ വേദനയില്‍ പൊട്ടിച്ചിരിച്ചു  
എന്‍റെ വായ മൂടിക്കെട്ടി
 എന്നെ തീവ്രവാദിയെന്നു വിളിച്ചു 
ആവിഷ്കാര സ്വാതന്ത്ര്യം